ఇశాన్ కి నివాళి

ఇశాన్ వేదం ఇప్పుడు మన మధ్య లేడు. క్యాన్సర్ ఎక్కువ బాధ పెట్టకుండా వాడిని దేవుడి దగ్గరకి తీసుకెళ్లిపోయింది. వాడు మాతో ఉన్నది సంవత్సరము పైన ఆరు నెలలు. కానీ వాడి జ్ఞాపకాలు జీవితాంతం మమ్మల్ని వెంటాడుతూనే ఉంటాయి.

"ఇలా ఎందుకు జరిగింది?" అనే ప్రశ్నకు సమాధానం మాకు ఎప్పటికీ దొరకదు. భగవంతుని లీలలు అర్థం చేసుకొనే మేధస్సు మాకు లేదు. మాకు ఖచ్చితంగా తెలిసిన విషయం ఒక్కటే. ఆయన ఏమీ చేసినా దానికో పరమార్థం ఉండే ఉంటుంది.

ఇశాన్ ఒక విధంగా ఇంకా బ్రతికే ఉన్నాడు. తన అవయవాలను దానం ఇచ్చి నలుగురికీ వారి జీవితంలో మరువలేని సహాయం చేశాడు. మాస్టర్ శౌర్య తర్వాత ఆంధ్ర ప్రదేశ్ లో అతి చిన్న అవయవ దాత అయ్యాడు. మహోన్నత శిఖరాలని అధిగమించాడు ఒక అసాధారణ వ్యక్తిగా.

వాడు మాకు చాలా జీవిత సత్యాలు నేర్పాడు. మరణం అనేది కేవలం ఒక మార్పు మాత్రమే అని చెప్పాడు. ఇక ముందు మాకు ఎటువంటి కష్టాలైనా చిన్నవిగానే కనిపించేటట్లు చేశాడు. డబ్బు ఎందుకు పనికిరాదు అని విడమార్చి బోధించాడు. (అమెరికా లో చికిత్స చేయించగల స్థోమత ఉండి కూడా అందుకు వ్యవధి లేని పరిస్థితి).

రేయ్, నువ్వు లేని లోటు ఎప్పటికీ తీరదు. కానీ మేము నీ తల్లి తండ్రులం అని గర్వంగా చెప్పుకునే అవకాశం కల్పించావు. మాతో నువ్వు గడిపిన మధుర క్షణాలు మేము ఎన్నడూ మరువలేము. మళ్లీ నీకు ఎప్పుడన్నా ఈ లోకానికి రావాలనిపిస్తే నీకు స్వాగతం చెప్పడానికి మేము ఎప్పుడూ ఎదురుచూస్తూనే ఉంటాము.

ఇట్లు
వేణు